Vindmøllekampen - foredrag med Anders Totland og paneldebatt om energi- og miljøpolitikk i Øygarden kommune.

Kvifor har det vorte så stor motstand mot vindkraft i Noreg? Utbygging av nye vindkraftanlegg hadde politisk støtte og skapte lite konflikt, men no er det bråk over heile landet. Debatten om vindkrafta har hardna til, nyhendebiletet er prega av brennande anleggsmaskinar, stadig nye rettssaker, skuldingar om korrupsjon, og bygdefolk som har slutta å snakke med naboane sine.

Samfunnsvitar og forfattar Anders Totland er særleg opptatt av menneska som står midt oppe i desse vindkraftkampane. Han har reist land og strand rundt og møtt mange av dei, og er aktuell med bok om dette folkeopprøret. Boka har fått fornya aktualitet etter at krigen i Ukraina braut ut og sanksjonar mot russisk gass kom på toppen av energiunderskotet som ei følgje av det grøne skiftet. Vil det bli auka press på Noreg om å forsyne Europa med fornybar energi fra vatn og vind?

Vi nyttar høvet denne kvelden til å dra i gang ein debatt om energi- og miljøpolitikk i Øygarden kommune. Panelet består av lokalpolitikarar frå heile det politiske spekteret og blir leia av redaktør i Vestnytt, Marit Kalgraf. Vel møtt!